By Benjamin Cuaresma
MANILA — Naghahanda na ang Philippine National Police (PNP) para sa inaasahang mga kilos-protesta kasabay ng ikalawang State of the Nation Address (SONA) ni Pangulong Ferdinand Marcos Jr. sa Hulyo 27, kabilang ang malawakang deployment ng humigit-kumulang 20,000 tauhan at pagpapatupad ng mga traffic at security measures sa Metro Manila.
Ayon kay National Capital Region Police Office (NCRPO) spokesperson Police Major Hazel Asilo, patuloy pa ring tinutukoy ng pulisya ang mga grupong lalahok sa mga demonstrasyon, habang isinasapinal ang security at traffic management plan para sa araw ng SONA.
Kabilang sa mga lugar na inaasahang makakaranas ng mahigpit na seguridad at posibleng pansamantalang pagsasara ng mga kalsada ang paligid ng Batasang Pambansa, People Power Monument (EDSA Shrine), Commonwealth Avenue, Quezon Avenue, at ilang bahagi ng Katipunan Avenue.
Sinabi ni Asilo na bukod sa mga tauhan ng NCRPO, magmumula rin ang karagdagang pwersa sa iba’t ibang police support units at iba pang law enforcement agencies upang matiyak ang kaayusan at kaligtasan ng publiko.
Samantala, inanunsyo ng United People’s Initiative (UPI), isang grupo na pinangungunahan ng ilang retiradong heneral, ang pagsasagawa ng magkakasabay na People’s Indignation Rally sa iba’t ibang bahagi ng bansa bilang bahagi ng kanilang panawagan laban sa katiwalian sa pamahalaan.
Ayon sa UPI, layunin ng kilos-protesta na igiit ang pananagutan ng mga tiwaling opisyal, mabawi ang umano’y ninakaw na pondo ng taumbayan, at isulong ang mas mataas na pamantayan ng good governance.
Nakatakdang ganapin ang mga pagtitipon simula alas-2 ng hapon sa Hulyo 19 sa Liwasang Bonifacio sa Maynila, Plaza Independencia sa Cebu City, City Plaza sa Cotabato, Polomolok Gymnasium sa South Cotabato, City Plaza sa Basilan, Plaza Quince sa Naga City, at Paramagtown sa Bukidnon.
Patuloy namang binabantayan ng mga awtoridad ang mga paghahanda para sa SONA habang nakikipag-ugnayan sa mga organizer upang matiyak ang mapayapa at maayos na pagdaraos ng mga nakatakdang aktibidad.
ia/xf
